金錢、自由與尊嚴：開博文

「果日太古城有個阿叔，好豪咁對住啲狗講話『我攞少少錢出尼就買得起你地三萬隻狗』，果下我先意識到原來錢係咁有用。唔好話買起咩，至少我可以資助我認同嘅事業先」同朋友閒談講起，原來係資本主義嘅世界，錢先最有效嘅選票。

另一個朋友又講起佢係屋企同屋企人困獸鬥，下下比屋企人食住，疫情下又走唔到，「如果有錢我真係想搬出去，唔洗睇佢地面色⋯⋯不過無錢唯有硬食」原來無錢嘅人係無選擇，更加唔好講自由同尊嚴，你只可以做一個睇人面色嘅奴棣。

令我更驚訝嘅係，大古城巴打係一個讀國際關繫，對時事地緣政治富有觸覺，非常聰明嘅人；而困獸鬥絲打係一個識得拍片剪片，有做開youtuber，同樣都係不可多得嘅人才，都為錢財頭痕。無他嘅，只係資本主義之下有一技之長並唔足夠，你仲需要資本操作嘅知識同能力。

呢個就係我開blog嘅原因。自從意識到自己處於絕對劣勢，我就一路好想儘力向上流，自己苦苦鑽研左兩年，算係對資本運作嘅機制有所了解，但就發現身邊嘅朋友就好似以前嘅自己咁一無所知。我想將我學到嘅野帶比大家，雖然唔算係好專家，自己都成日會懷疑自己，但我都想將我嘅掙扎同大家分享，做啱嘅大家可以跟，做錯嘅大家可以走少條歪路，希望大家會見證到呢個窮撚掙扎成功。

為自由，為尊嚴，駕馭資本，敬資本主義。

不過講解點樣駕馭資本之前，首先係要了解資本點樣駕馭你。