政府同銀行如何利用你的無知

「通脹」呢個詞大家都成日聽，但大家嘅理解可能都係流於「食飯會貴左」呢個level。其實通貨膨脹本身指嘅係巿場流通嘅通貨（即係錢）多左，物價上升只係佢其中一個可能嘅結果，亦唔係多左銀紙物價就一定升。但睇番過去十年，香港嘅物價有升無減，大約每年上升3%左右，即係過去十年物價整體貴左34%！2010嘅100蚊買到8支午後紅茶，今日只係買到6支，等量貨幣嘅購買力減少左，咁啲購買力去左邊呢？就係去左貨幣發行機構（aka政府）度！

假設萬元世界入面有$10000貨幣，有1000件商品，咁平均尼講就每件商品$10蚊。國家入面有10個國民，每人有$1000，平均每人可以買100件商品。突然間有條友印左$1000出尼，國家入面變左有$11000貨幣，而商品數無變，每樣野就變左平均$11蚊。無印銀紙嘅人就變左平均淨係買到90件商品，印銀紙果個人就可以買到180件！掌握左貨幣發行權嘅機構，就可以以印銀紙嘅方法強行抽走其他人嘅購買力；如果佢偷左你嘅購買力係用係公益用途就話啫，但通常都係好似2008年嘅美國咁，印出尼嘅購買力用哂尼貼銀行家！

睇到呢度我諗大家就會明白點解揸現金係一件好笨嘅事。但係我要話埋比大家知，現金放嘅地方----銀行同樣係一個派錢（你派比銀行）嘅行為。

大家都知銀行盈利模式係通過低息接受存款，再用存款高息放貸賺取息差。正常尼講銀行係要提高存款利率，同其他投資產品競爭，吸引人存款佢先有錢借出去。但由於世人普遍對投資嘅唔同產品不了解，甚至對投資呢件事滿懷恐懼，淨係敢放係銀行，所以銀行可以接近0%利率收到大量存款。只要佢高過0%（which要低過好難）借啲錢出去，收得番就可以有息差賺，同時由於銀行動用自己嘅資本係好少（最低係資產或者總借貸嘅10.5%），佢就可以笠哂用你嘅錢產生嘅利潤，達到超過15%嘅回報。當然，做存戶嘅你都分到0.1%嘅。

結合通脹去睇，銀行就係將通脹風險全數轉嫁落存戶度，自己袋哂啲盈利，達到本金追到通脹有凸。係咪覺得自己比資本主義嘅expert player 撚狗咁撚呢？你用時間同勞力賺番尼嘅購買力就咁比政府一點點咁搶走，仲做埋銀行家嘅肥料添！

有啲讀者可能就唔係好gur，喂，咁點先可以唔比班仆街搶走我啲血汗錢啊？如果用現金唔係儲存勞動成果嘅好方法，我地仲可以用咩形式儲存財富？