儲蓄保X老母：到底點解啲人成日話佢呃人？

觀眾要求：好奇寶寶就得鳥

-----------------

話說早排睇到個連登post《成日聽儲蓄保險呃人 究竟點解》，我就諗起我有個朋友佢而家月供緊5k儲蓄保，又同女朋友出左尼租樓住，而家個個月都手頭緊。我嘗試過說服佢唔好供但佢無聽我建議，雖然唔能夠導人向善係我道行唔夠，但而家見親都問佢仲有幾耐先供完再強烈恥笑佢。

咁恥笑還恥笑，個笑點係邊呢？係咪話儲蓄保真係on99呢？等我再重申一次：投資工具只係工具，有無用完全睇用果條友。雖然整體而言，我個人對儲蓄保嘅評價係唔高，但我都係力陳利害，等各位自行判斷。

所謂儲蓄保，大約有以下特性*：

1. 定期向保險公司繳交指定金額
2. 中途退保取回金額，很可能遠低於已繳保費
3. 一般存在手續費
4. 期滿回報分保證部份同非保證回報
5. 回報低，3.3%已經算係「高達」**，而過去十年平均通脹率係2.86%

咁以一個投資產品對一個投資人嘅角度尼講呢，第一點已經好濕滯。每月都必須要供款意味住你每個月可以支配嘅現金減少，即係話如果你突然想投資、睇醫生、買野等等用現金先做到嘅野你就做少左。Cash is option and cashflow is freedom，本來投資就應該係為左增加被動現金流，一個減少Cashflow嘅投資在我眼中看來就係本末倒置。當然對於完全無自制力嘅人尼講一出糧就拎走佢啲錢可能係一件好事，但我假設各位都係有自制力而且想投資先會入尼睇文，所以無自制力嘅人由佢死啦。

第二點就係流動性問題。所謂流動性，大家可以先理解為短時間內動用錢嘅能力，因此除左儲蓄仲可以計埋借貸力。流動性對個人尼講好重要，有咩急病要做心術、生意周轉唔尼、甚至係請下屋企人食餐好等等大lump sum嘅支出，就係由流動性支撐。儲蓄保個問題就係通過退回罰款鎖定你舊錢，等你無法動用呢筆財富，即係拎走你嘅流動性，減低你應付突發事件嘅能力。如果你主要資產係儲蓄保，有流動性需要嘅時候係咪要問人借？銀行咁高息（相對儲蓄保嘅回報），你短短地借一年可能已經蝕番轉頭。

第三點係手續費，手續費好陰濕咁偷走你嘅回報，尤其係投資額唔高嘅情況下，手續費佔比就會好高，甚至會蝕埋你本身已經係個悲劇嘅回報。

第四點係連登po入面都有講，就話之所以會令人覺得呃人，最主要係因為啲經紀成日都會篤住個非保證回報去sell你，講到好好賺咁氹你買（which對於一個有視野嘅投資者尼講，你去到7%都未必會買）。呢個就係第四點個on9位。

講到呢度，我想順手介紹下保險公司係點賺錢嘅。保費同賠償嘅比例係經過精算，確保意外發生嘅賠償唔會多過收番尼嘅保費凸。但保險公司係其實通過投資賺錢嘅，而唔係賣人壽然後賭你唔死。由於收番尼嘅保費係先於賠償發生，保險公司就會有大量閒餘現金，稱為浮存金Float#。呢啲現金梗係用尼投資賺錢啦，仲要唔似得銀行只能貸款，佢可以投資係好多唔嘅證券，賺取比銀行更高嘅回報。銀行啲存款都要比利息，保費呢啲資金係接近零成本架！你唔要嘅流動性同現金，識玩嘅專家視之如寶啊柒頭！

第五點就係回報低，真係啱啱好夠追通脹，名副其實係儲蓄保（做咩啫人地名副其實又要比你屌？），呢個係死罪尼。點解死罪？因為過去十年有四年通脹係超過3.3%，即係實際上購買力衰退，儲蓄都唔撚得；仲要想話杠桿增加回報都唔得，真係膠都費撚事派。

咁有啲人就話啦，儲蓄保安全吖！風險同回報梗係成正比架啦！我話你知，風險高回報先高、回報低風險就低係我人生聽過最大嘅大話，有機再講。我係度比大家睇下風險低過或者等於儲蓄保嘅其他投資產品嘅回報你就明：

iBond，通脹掛勾，最大杠桿33倍，回報過20%，由香港政府支持

長江基建集團，做供水供電，派息連續22年增長，最大杠桿5倍，回報可達25%，誠哥睇場

最好笑係連AIG呢啲大保險公司嘅公司債##唔做杠桿都有4.89%回報，咁你話我買AIG嘅債券定買佢嘅保險（唔肯定佢有無儲蓄保但一定有人壽）好？

------------

*參考自《【儲蓄保險 2020】儲蓄保險邊間好？比較計劃好處及陷阱》

**立橋人壽喜盈於「息」五年儲蓄保障計劃 2，保單供款期為2 年，5 年期滿，而保費門檻由年繳2,500美元起，期滿保證回報率每年為3.27厘，如一筆過同時預繳第二年保費，期滿保證回報率更可高逹每年3.3厘，摘自《【儲蓄保險 2020】儲蓄保險邊間好？比較計劃好處及陷阱》

***2019統計年報第7頁

#How To Value An Insurance Company

##AIG CORP 6.25 Mar15 2037 026874BE6