the End of Price Discovery：價值投資的困境

觀眾要求：大約知到有價值投資呢樣野存在

咩係價值投資？

我諗好多人都知道有樣野叫價值投資，因為呢個投資學派有一個好出名嘅人叫巴菲特。巴菲特呢個游泳健將名氣大到你有無投資都應該聽過架啦，但係對於佢信奉嘅投資哲學「價值投資」大家可能就未必咁清楚。不過價值投資唔係啲咩深奧嘅野，一言蔽之，價值投資就係指投資於價格大幅低於價值嘅投資標的。

句野好簡單，但入面其實有好多前設同巿場觀念：

一、認為價格係會低過價值，即係巿場定價係唔efficient，短期內會時常低估或者高估某件野嘅價格，拉濶尼睇總係會回歸番個價值。

二、係你要搵到個價值，咁就涉及左一啲公司基本面分析、估值等等；而一間公司嘅價值，全然在於佢可以產生嘅收益。

三、呢個我好少見價值投資者提，但係巴老個老師本《證券分析》入面佢用過一個思考，就係將價格當成唔同因素嘅涵數，比如100蚊入面有50係投資價值，有20蚊係合理推測嘅成長價值，仲有30係巿場氣氛帶來嘅投機價值咁。

價值投資者著重嘅價格同價值嘅差異，稱之為「安全邊際 Safety Margin」，既係風險嘅緩衝亦係獲利嘅空間。由於買入價格係價值以下，所以即使股價持續下跌對投資者尼講都只係以更平價格繼續增持嘅機會；即使股價唔上升，業務運作帶來嘅價值亦會通過分派股息等方法惠及投資者。而長遠尼講巿場總係會發現個標的嘅價值，投資者湧入會令價格上升番，巿場對標的嘅價格修正就會成為資本增值獲利嘅空間。低成本獲得公司分派同未來嘅資本增值，就係價值投資者獲利嘅原理，而家價值投資者嘅困境就在於「巿場發現價值」嘅功能正在消失。

巿場短期內係投票機，長期尼講係稱重機

巿場嘅本質其實就係一個票站，唔同嘅人基於唔同嘅原因將自己嘅資金投資係唔同標的上面，用以指導資本流向及使用，係一個好集體決定資源分配嘅方法。同民主一樣，巿場只能係所有投票人都有獨立思考、各有自己判斷依據果陣先係最有效率、最貼近現實需要；只有投資者以企業提供嘅回報為依歸分配資金，巿場先會回歸價值。同等風險下所有人都投資係2%回報嘅資產而唔投資係10%回報嘅資產嘅巿場，係一個無效率嘅巿場。

價格、價值背離

咁但係廿一世紀嘅資本巿場就係一個咁嘅巿場。越尼越多對資產價值無概念嘅人進入巿場，有啲就聽人講冧把就買，有啲就投資ETF，有啲就用演算法交易，有啲就動能投資，總之無咩人認真咁分析間公司到底係做乜。越尼越少人運用自己嘅分析去投票，轉而將自己嘅票交比人地去投，或者唔依據公司嘅價值去投票，導致資產價格只有極少部份係依其價值、係一個缺乏分析檢驗嘅情況下訂定，導致價格兩極化，出現好多一百年都回唔到本但好多人要嘅投資，以及一年回報但無人問津嘅機會。更甚嘅係一啲追蹤香港恆指成分股嘅ETF，佢嘅投資變相係由揀指數嘅人決定，呢個人就掌握左數千億資金何去何從嘅權力！咁absolutr嘅power自然會corrupt absolutely，你數下恆指有幾多非香港公司就知。

扭曲巿場下價值投資者如何自處

個巿場function扭曲到咁樣有時係有意為之，比如用尼打金融戰、穏定民心等等。一個咁嘅巿場仲有好多影響，但我今日想focus番係對價值投資者嘅影響。事實擺在眼前係價值投資者比起上一代更加難benefit from巿場修正，淨番企業本身嘅分派，可以話係斷半臂；加上睇住身邊嘅人踩住個奇撚怪巿場賺到笑（可以成個國家GDP少左30%都唔跌，GDP跌30%即係所有公司總收入少左30%喎，點支撐個咁高嘅價格？你會唔會用10k去買一舊廁紙？），真係好痛苦。

歷史話比我地知嘅係，債務泡沫始終會亦都需要爆破，否則巿場會失去分配資源嘅功能，價值投資者係基於呢個觀察始終堅守基本分析同安全邊際。但係2020年嘅今日，美聯儲印銀紙印到直頭出手買公司債嘅時候，無收益支撐嘅價格又可以維持到幾時呢？我諗只能夠坐穏，拭目以待。