如何handle OPM（一）

投資資金來源一般都係果幾個，一係自己己儲蓄，或者親戚朋友託管，或者係借番尼。咁絕大部份嘅小投資人嘅資金我諗都係自己草番尼嘅，因為係香港大部份人都好抗拒同親近嘅人有啲咩金錢瓜葛，最好無拖無欠，講錢傷感情；至於借錢，時不時都聽到啲人孖展輸身家，一夜之間乜都無哂去跳樓，又或者係借財仔被追斬，聽多幾次你就會覺得借錢都係不了。

記得果陣大學教授話過，有啲藥係好猛烈，但係唔會因為佢猛烈你就唔用，就好似較剪係危險架啦，但你唔會foever ban it from a baby，而係要教識佢點揸較剪，幾時應該用較剪。借錢負債都係咁，佢係鋒利嘅，佢有佢可以造成嘅傷害，佢可以令人輸身家。但正如上篇文提過嘅，我地唔係要一味數某樣野嘅風險然後敬而遠之，而係要量化然後駕馭佢為己所用。適當借貨可以提高收益，但係實行之前，我地要先了解借貸有咩風險以及點去處理佢地。

一、斬倉

首先要講解下孖展點樣work。孖展係資產抵押貸款嘅一種，原理上同樓宇按揭一樣，都係同貸方（借比你條友）訂立合約，如果還唔起錢嘅話貸方就有權沒收抵押資產。孖展margin loan就係係買入證券果陣由貸方提供一部份資金買入，等你可以用50蚊本金加埋佢借比你50蚊買到100蚊嘅資產咁。

一般貸方會設立兩條線：initital margin IM同埋mantainance margin MM。initial margin就係指你一開始要有幾多本金先可以買到呢個資產，而maintanance margin 就係你要幾多本金先可以繼續持有呢個資產。比如一個100蚊嘅股票，IM係60，而MM係50，即係話你戶口要有60蚊先可以買到個股票，而如果個戶口跌到少過50蚊就唔可以繼持持有個股票，證券商會視你為還唔到錢（因為為佢借左50蚊比你，如果個股票跌到45蚊佢沒收左都會蝕錢）然後即刻沒收賣出。戶口本金清零，無左個資產亦食唔到任何收益，俗稱斬倉，係借貸投資比較痛嘅一個情況。

如果做左高成數孖展係價格大跌果陣仲可能會輸凸。假設某股大跌，你係100蚊果陣借左90蚊入，跌太快90蚊果陣放唔切要50蚊先放到，咁你就要補番果40蚊比證券商，呢個就係斬倉入面輸凸嘅情況，我諗跳樓果啲主要係呢啲。

由於斬倉嘅條件係戶口嘅本金低過MM，所以解決嘅方法有兩方面。第一係增加本金數以抵禦價格大幅波動，比如某股過去十年最大跌幅大約係30%，咁戶口保留本金數就要預留大約35%嘅空間比佢跌。另一個方法係揀啲波動無咁大嘅資產，比如港燈呢啲經歷金融海嘯跌幅都只係10幾%，咁你要保留嘅空間就可以少啲，回報就可以高啲（不過相對之下呢啲資產本身個收益率都比較低，因為可杠桿度高嘅資產就有更多資金去追佢地）。

另一個危險就係現金流錯配，聽日講。