Podcast後感：回報、風險與風險管理

今日聽左個podcast，個主題係同風險有關，咁聽聽下我諗起好多投資初哥（包括我啦）對於風險有幾個層次嘅認識：

1. 無認識，隠約覺得間公司幾好似係會賺就去碼
2. 大約知道有風險但照去碼；或者覺得會損手爛腳好危險，都係咪撚搞
3. 非常了解風險，可以詳細列出某間公司有咩劣勢或者困境，未來有咩唔利好嘅因素，積極說服自己唔好投資呢間公司，但你問佢最差會蝕幾多，佢答你唔到

呢幾個層次嘅認識嘅問題係邊呢？就係在於佢地對作出決定其實無咩指導作用，又或者話佢地其實缺乏一把尺或者原則去決定呢個風險下應唔應該投資。第一層同第二層第一種一樣，佢地投資決定都係無考慮到有咩風險。第二層第二種同第三層雖然有考慮風險，但係佢地個思維僅僅係停留係好模糊嘅有或者無風險。但係大佬啊，美國國債都有違約風險架，你唔比我大支那真係打贏左三戰？要等到完全無風險先投資又實唔實際？

咁到底一個點樣嘅風險觀對個人投資者尼講先有意義呢？我認為風險可以取以下定義：

風險係損失嘅機率同幅度

呢個風險觀有啲咩好處呢？就係佢將風險因素量化而具象咁呈現出尼；當你量化左潛在損失，你就可以用尼同潛在回報比較。比如有個投資品類A，回報係25%，睇落好吸引啦，但原來潛在損失係50%嘅，咁好明顯就係搵笨柒啦，因為A品類整體長遠尼講回報係-25%，仲衰過賭場；如果有個投資品類B回報係10%，潛在損失係5%嘅，咁佢長遠回報有5%，如果無其他更好嘅咁咪值得投資。如果唔量化風險同回報並作出比較，根本無法知道個投資係賺定蝕，更莫講話做出正確嘅投資決定或者係管理風險。

如果我地採納呢個風險觀，咁就可以開始了解下一啲管理風險嘅方法。

一、波動性*預算 Volatility Budget

咩係volatility budget呢？按個podcast講，係投資者個人可以接受嘅波動性或者損失嘅絕對值。比如話Max囝（上篇文果條粉皮！）接受到自己最最最盡可以接受損失1000鎂嘅，呢個就係佢嘅Volatility Budget (我簡稱佢VB啦）。VB自己本身係唔夠的，你仲要為你嘅投資物評估一個Volatility Factor，有啲人會用Beta Value，Podcast條友就會用Average True Range（我未睇通係咩尼），但最終你要得出嘅係一個%係你個投資物最多會損失幾多，let's say 一個係10%，一個係50%。咁你就可以用你個volatility budget除番最大損失，得出嘅數就係你可以係該投資物投資嘅金額，比如10% 果個Max囝就可以投資10000鎂，但50% 果個就只可以投資2000鎂，咁就可以控制到最差最差都仲係你預算之內。

Podcast入面無提到具體點樣計算呢個Volatility Factor出尼。我諗原因係永遠worst case都係100% loss，但係你必需要評估有幾likely佢會去到咁然後計番個expected value，或者係90%嘅情況下佢會去到點樣，Either way都係要得出一個推算嘅%，而做到幾仔細就視乎你統計學或者睇財報嘅修為。我就唔係咁識嘅，但要推估總有啲數據可以參考，比如債券就可以按評級參考番穆迪嘅違約率統計、股票可以睇番同行業嘅Beta或者Maximum Drawdown咁。

二、止損 Stop Loss

佢引用左快思慢想個作者嘅研究，發現人係好損失嫌惡嘅。嫌惡到一個點係隻股跌左90%都好，留比個孫，一日唔賣一日都有機會翻身！另一方面人好怕損失，怕到隻股升左10%已經好驚佢跌番，拿拿來賣左佢實現**左個盈利先。一般人好正常就會係10%止賺但90%都唔止蝕，長遠尼講咪蝕多過賺。所以要調番轉，蝕果陣有紀律咁止蝕，賺果陣就勇番啲。佢仲講左好多止蝕嘅心理學同方法但我無咩興趣講。

三、組合分散***

咁但係無論你點計volatility factor and budget，"To err is human"，你會推算錯，世界會有黑天鵝，機率計算嘅亦東西永遠係in the long run或者群體性嘅結果。如果預期損失係10%，可以理解做你投資係一百個類似投資物、或者投資同一個投資物一百次果陣，你會有十個項目完全收皮。雖然長期巿場係會反覆向上，但巿場短期嘅未來係不確定而無法預測的（一個價值投資重點概念），即係話只投資係少數標的嘅話，計得再準都係賭緊個投資唔係食屎果堆。咁所以投資者係需要replicate番個數據出現嘅環境----即係增加投資項目，分散投資。

分散投資嘅意思唔係話你買好多唔同公司嘅投資品就得。如果你十幾隻全撚部買哂石油股嘅，係就係你分散左個別石油公司出事嘅機率，但如果成個行業仆街咁點先？咁買左唔同行業，但全部都係港（支那）股，咁支那經濟仆街咁點先？當你買左港美星歐澳泰英法德嘅唔同行業嘅標的，咁冚球剷點先？（信我，到時你需要嘅係午餐肉）你可以見到分散投資唔係萬能，再分散都會有無法規避嘅風險。

分散投資亦都有佢嘅壞處。我假設有一百個投資標的，依佢嘅潛在回報排行，總有某啲標的比其他回報高；而最大化回報嘅組合，永遠係all in最高回報果個；分散的確係減低左風險，但同時你會被逼買入啲無咁高回報嘅資產。

咁所以能夠將風險同回報量化加以比較嘅思維就好重要。你既唔需要將風險減到零，亦唔係要all in搏佢唔會炒，而係要拎番volatility budgeting同factor出尼，再同你預期嘅回報比較，睇下咩程度嘅分散可以達到最佳化嘅組合。最佳風險回報比嘅組合可以係淨係投資香港科技股，亦可以係全球嘅指數基金，一切都係你嘅分析得出。前提係你醒起要分析同知道要分析乜。

P.S. 過左十二點添，28/8無出到文⋯⋯

Podcast Link: The Doctor of Risk Management: Stop loss, Volatility, Stock Picking and more

Dr. Richard M. Smith，致力於推廣個人投資，佢個網

---------------------------

*係我嘅資本掙扎生涯入面，風險、波動性同不確定性三樣野成日都會以「風險」一詞一言概之，但對我尼講三者意義係唔同的。風險Risk 就係潛在損失啦；波動性Volatility比較狹義，指資產價格嘅上下波動；不確定性uncertainty係無法預測的，比如係聽日打三戰、雜種心臟病發呢啲；不過今日主要係想講個podcast，所以三者個分別遲下再講。

**實現呢個現金本位嘅思維，長遠對財富有不利影響，詳見財富的儲存形式

***分散投資引申嘅重要概念，投資係要以組合形式進行，涉及長線而複數嘅投資決定，以及投資品間嘅關系管理，呢個又係呢一個topic鳥