股票只係工具，投資要講目的

當講起投資嘅時候，最常遇到嘅兩種反應。第一種係「哦⋯⋯ 係囉，投資幾好啊」，第二種係「我有投資啊！我買左股票，幾日就贏/輸左X個%，好癡線」。第一種係唔知點解天生對於錢同財富係完全唔感興趣，就算身邊人賺到點都覺得唔關自己事，先唔好理第一種人。我今日想講嘅係第二種人。

對第二種人尼講，投資＝買股票，升值＝賺，投資就係買股票升左放賺到錢。嚴格尼講佢地嘅諗法係啱嘅，就算係投資元老巴菲特果啲都係買入股票持有升值去獲利架啦。好多散戶就會聽下啲財演講某啲number話會升啦，聽完又好似幾有道理咁，咁就買左某股票等佢升左賣番出去賺錢食多幾餐放題啦！咁但係如果你認真咁諗，其實係可以有好多問題要考慮，比如係：

1. 買邊隻股票？點解買呢隻？風險同回報比值唔值？
2. 咩時機買？揸幾耐？幾時放？
3. 幾錢買？
4. 資金來源？
5. 我買尼係想得到啲咩？
6. ....

《證券分析》將投資要問嘅呢啲問題濃縮如下：

Should security S be bought (or sold, or retained) at price P, at this time T, by individual I?

投資者I應否在時間T以價格P買入（或持有或賣出）證券S？

一開始見到呢句野覺得好奇怪。投資就係為左賺錢啫，關投資者個人咩事呢？原來係因為唔同嘅人其實會有唔同嘅風險偏好同埋盈利形式需要，視乎你嘅資本大小、投資目的、風險耐受性唔同，I、T、S會出現唔同嘅答案：一個手上無乜錢但對於預測個股走哂有特殊天賦嘅人會買期權以小搏大；一個需要穏定收入支持生活嘅老人家受到大風浪未必有時間比佢東山再起，佢可能會買較為穩定嘅債券；一個野心勃勃嘅企業家會買入股票併購公司；投資者嘅身份以及其引申嘅目的，決定左S、T、P嘅範圍。

因為I係一個如此重要嘅因素，所以當我地做某個投資決定之前，必需要𨤳清自己嘅I。你係為左咩而投資？呢個投資對你嘅人生目標起緊咩作用？好多人係從來無思考呢個問題（香港人係好少有機會或者動力去思考人生要點走，莫講話個投資有咩用），以致有少少閒錢有隱隱約約知道錢會貶值咁啱朋友推介話有個神算話乜乜會升就衝左入去做韮菜。我唔係反對短炒，身邊都有好多短炒叻嘅朋友，但邊有咁多人賺夠想比人賺下？大佬咪咁癡線啦。

假設番一個好普通月入18k嘅大學生先啦，佢叫Max囝，每個月洗10k左右，單身又唔洗比家用喎，咁佢想嘅係40碎退休財務自由（即係唔洗做每月都有夠食嘅收入）。要做到咁，Max囝就要創造一個每月可以產生10k被動收入嘅投資組合。咁啱佢估巿有啲天份，可以短炒獲利達每年20%，但就要好花心機先得。於是佢一路將啲本金滾大左一部份之後，轉而杠桿投資債券，再將債息投資係REITs（房地產投資信託，大約等於買樓收租），從而慢慢咁累積起被動收入。

當你個人設同個目標出左尼嘅時候，投資就唔係好虛無咁話「我要賺錢」，而係「我要點樣配置幾多資產先可以達到呢個目標」，之後到具體工具嘅選擇先至問到「我應否在時間T以價格P買入（或持有或賣出）證券S」；一般散戶個問題就在於佢skip哂自己投資嘅目的、又無認識唔同嘅投資工具，直接就問最後果個問題，於是佢個目的不明，淨係識股票，T同P就聽人講，其實賺蝕都唔知發生左咩事，亦都好難確保自己可以再成功一次或者避免失敗。

之但係香港散戶呢個問題，我認為係蓄意塑造出尼嘅。香港教育從來唔教你點處理你嘅資本（仲要資本主義社會喎屌），而社會氛圍亦都刻意營造到投資係個分秒必爭不容思考、你永遠唔會比專家識得多咁但呢個係後話啦，或者下次隨筆再講吧。