What is Bond：稍為認真少少嘅揀Bond之路

觀眾要求：唔要求太多因為應該無咩人有接觸過債券投資

----------------------------

咩係債券？

債券同股權嘅最大分別就係「義務」兩個字。係股權入面，無野係必然，公司中意就分派（除左REITs），中意就配股，亦都唔存在還本金比股東呢啲野。而債券本質上係一張借據，持有債券就等於借左票面金額比相關公司，公司有義務係到期日償還票面注明本金額，以及係注明日期分派利息比持有人。公司必需先清償債務同利息，淨番嘅盈利先可以考慮再投資、分派比股東等等行動。公司破產果陣，債券持有人可以優先於股東拎到清算嘅價值。

換句話說，如果間公司持續營運係無問題嘅，佢嘅債券就一定收到本息。如果出左問題，公司就算要犧牲股東利益都要先搞掂債務相關開支，如果唔係就要執笠。對盈利同資產嘅優先索取權逼使普通股東幫債券持有人包底，所以同一間公司尼講，其債券一般會比其普通股收益穏定。

債券屬於固定收益類工具，收益比普通股有保證，但就唔會超過保證額。就算一間公司業務突飛猛進，賺多舊年一倍，只有普通股持有人會賺多左，債券持有人收嘅利息唔會有變化，本金償還都唔會多左。平凡而穩陣嘅回報，就係債券嘅寫照。

穩定現金流

債券整體收益較為安全有保證，所以價格較為穏定，斬倉風險較低（唔代表你可以做盡架！）；加上定時嘅現金利息分派產生可預期嘅現金流，非常適合搭配杠桿使用。

債券同REITs一樣可以擔當組合中現金工廠嘅角色，而債比REITs好嘅係現金流額固定，只要唔破產本金一定攞得番，唔會好似REITs咁因價跌損失本金。唔好嘅係債券會到期，而到期嘅本金未必可以搵到同等報酬嘅債券，即係要面對再投資風險。最大嘅壞處係債券回報同貨幣掛鈎而唔係同業務掛鈎，對惡性通脹無抵抗力；如果計價貨幣係委內瑞拉波利瓦爾，未到期購買力已經變零，呢點係要注意，但美債、美國、美元，嗯⋯⋯。

除左現金分派穏定，低於票面出售嘅債券都有相當唔錯嘅投機價值。有時一啲巿場唔係咁青睞嘅公司債券可能被拋售到60蚊就買到100蚊票面嘅借據，但如果通過分析發現其實間公司係還到債，咁投資者就可以得到本金同價格嘅差額（100-60＝40）加埋利息分配，實際回報可以好和味。

調查深度要求較低

既然公司業務好唔好同債券持有人無關，咁要求就好簡單，我總結為十四個字：「不求他日好出色，只要到期還本息」，唯一嘅concern就係還唔還到錢，比唔比到息。如果你好了解間公司有咩技術成本優勢、規模品牌效應、估計到佢未來可以點growth、用哂DCF啊PE啊咩方法去估值故然係好，但如果你唔識或者懶做，一啲基本嘅Interest Coverage、Debt Ratio等test就可以知道間公司到底還唔還得起條債，整件事對投資者要求比較低，可以作為財務分析嘅新手村任務，慢慢build up分析財報嘅能力，唔洗一尼就比DCF嚇親。

債券嘅CV

公司分析深度要求唔高，但債券就多條款野睇。股票就有啲咩派息、派息比率、盈利甚麼的，用尼好初步咁認識下呢隻係咩股，債券自然都有類似嘅東西係投資者不得不知道嘅。如果你係用IB嘅，double click條債會見到下面呢個外星文表：

呢個表就係隻債嘅「CV」，上面寫左有關呢隻債嘅基本數據，主要有幾點要識睇：

1. Underlying：講緊呢隻債係邊間公司孭嘅
2. CUSIP/ISIN：相當於隻債嘅身份證，避免相似債混淆
3. Maturity：幾時到期
4. Next Option, Callable Puttable：Callable指公司可以提早找左筆數佢，Puttable係指持有人可以提早要公司找數，如果可以Put或者Call就會係相應項寫Yes；兩者都係要係指定日期做，果個日期就係Next Option
5. Face Value：票面價值，即係借據上面公司欠你嘅金額
6. Coupon：要面利率，即係借據上面公司要比嘅息口
7. Payment Frequency：付息付得幾密，呢度係半年一次
8. Convertible：有啲債某啲情況下可以轉換做優先股或者普通股，就叫Convertible
9. Ratings：評級機構嘅評級囉，大約係越多字越近A越好
10. Amount Outstanding：呢隻債以面額計有幾多流通係巿面
11. Sector, Industry, Category：就係講間公司做邊行～
12. Currency：呢個重要，筆債用咩貨幣計價，就要用咩貨幣還
13. Country of Issue：孭債間公司係邊度做生意，夾埋Currency睇好重要。比如有幾間係阿根廷做發電廠嘅收入好穏定，但阿根廷披索連年貶值，美元債務負擔越尼越重，就未必還到本

債券評級

成日新聞聽到乜乜乜機構降左香港信貸評級去AA係咩尼架呢？有班碌柒會分析啲公司、經濟體嘅償債能力，比個分佢尼評判佢還本付息嘅成功率，就係評級嘅原意。如果評級唔靚就難啲借錢，變相令佢可能真係還唔到錢，所以評級都要睇睇架！打個CUSIP入Moody's個網會出呢個：

1. 先係講公司整體
1. Long Term Rating：就係長期嘅償債能力啦，Aaa係最高，Baa3樓下開始垃圾，C開始要好小心睇，因為十年破產率（好似）近40%了。留意番分析日期，比如最近四月油價炒過，如果個Rating係一月做嘅就可能唔準了
2. Short Term Rating：清償十二個月內債務嘅能力，SGL-1最好SGL-4最差
3. Outlook：就係展望評級會點啦，Negative就可能會跌，未來償債能力可能減退；Stable同Positive就係平穩同正面，照字面解得
2. 再講單條債：
1. LGD Loss Given Default：如果公司破產，呢條債會損失幾多，個人認為係幾好嘅參考尼，對你預計投資倉位有幫助
2. Class：分Seniority、Security同有無Back or Guarantee。Seniority係講你條債係整個資本結構入面有幾優先（有咩事十幾條債入面你排等幾攞錢）；Security講你條債有無野抵押（有嘅咁抵押資產賣左就還你先，無就排隊啦）；Back or Guarantee就係有無擔保（有嘅公司破左產都仲有人還，除非係自己擔保自己）

補充一點係可以睇到同公司嘅其他債大概係咩樣，有啲coupon高嘅可以望下抵唔抵買。

同REITs一樣，我會用Running Commentary嘅方法Walk through一次我揀債嘅篩選同分析，但如果擺同一篇文好似有啲長，所以就分做兩篇，下篇係呢度！