How to Bond：稍為認真少少嘅揀Bond之路

觀眾要求：要識少少睇財報嘅技巧，但唔識都可以試下睇

---------------------------

呢篇主要講點揀同分析，如果你未知Bond嘅角色同優劣係邊，請先睇睇呢篇文～

一、投資門檻

傳統尼講香港人要投資債券，首先要有一個私人銀行戶口；私人銀行戶口好似係要有8m港紙先開得（8million, 8maan同8wan嘅on9唔該含撚）；債券交易都係200kUSD起跳，如果大家唔夠嘅可以出番去了。

哎啊我點會咁撚尻大家呢（明明我都係個窮JJ），而家科技日新月異，Interactive Brokers已經可以用10k港紙開戶，2kUSD為單位交易債券，仲提供1.6%孖展利率，大家快啲開戶啦（IB快啲比廣告費我唔該）！！以我所知好似Firstrade都有得買債，但個Margin rate高到嚇死人，所以唔推介。

二、篩選

雖然有好多網可以查到債券資料，但係IB內置有個Bond Scanner，加上如果你唔打算開IB買咁睇其他網尼好似都無咩意思，同埋我已經唔記得係咩網（主要原因），今次嘅Screen會用番IB內建果個。一打開Bond Scanner係咁的，咁呃⋯⋯簡介一下，上面係篩選條件，下面係結果！

1. 第一件事梗係係最左手邊Instrument揀番主角Corp Bonds啦。其他野都有佢嘅特別，但今日唔係主角
2. Filters果度Set左Ask Yield 6～18%，Ask Yield係賣價下嘅到期收益率，有賣價即係有人賣。如果用Bid買方價尼搵就會有啲on9掛10蚊買AAPL債嘅野出現，呢個掛盤對買家尼講無意義，所以要用Ask。6%係我接受嘅回報底線，而18%係個比較隨意嘅數字，目的係為左篩走啲巿場認為就快破產嘅債（就破產》價格跌》收益率上升，呢個係債股唔同之一），大家自己做果陣可以唔寫呢格，但太高Yield嘅就要小心啲分析
3. 到期日遠嘅長債，不確定性高，價格波動會大啲，但可能多啲肉食；到期日近嘅短債會高啲機率還到，所以價格波動細啲，價格都會貼近票面，少咁啲本金歸還肉食。到期日set 2025係因為5年唔太長，不確定性、大變數機率可以接受嘅年期
4. 跟住係債券評級，Set左係兩間機構評B嘅尾尾，理由好簡單，想間公司係比專業人士審過有個參考，太垃圾就唔睇慳時間。
5. 我會tick 上巿公司only，因為上左巿嘅財務資料公司透明，查數易啲；無上巿果啲可能要email間公司，仲要好少會覆你；查數好重要，唔查數係賭，記住記住

篩完出尼結果係咁：

1. 我自己中意按industry排列，方便自己揀番portfolio無嘅行業分散投資。想提提大家呢個係好求其嘅分散方式，正路要搵啲beta值互相抵消嘅行業同公司，但我懶加唔識計所以搵啲唔太有關系嘅行業算，例如保險同油。
2. 今次目標係Oil&Gas。我習慣係由最高Yield開始一個個咁睇幾多錢起跳，要200k果啲skip走；2k起跳果啲㩒下購買，如果LTV低過50%嘅就Skip；兩樣都pass就放入watchlist等分析。最高Yield原則係REITs講過；200k都唔解釋啦點買吖屌你；LTV低過50%的話佔用流動性太多，一尼之後開到嘅杠桿會少左，二尼會大幅減少Margin Buffer，所以就不了

咁正路我就應該分析AR同PDCN，但因為已經分析過了，所以今次揀無分析過嘅QEP 74733VAC4做walk through。

三、分析

債券本身已經保證左有穩定嘅派息同本金歸還，所以我地唔洗睇佢管理層分派政策好唔好啊、肯唔肯同派唔派到息、派得穏唔穏定啊果啲，NO！我再Recap一次揀債十四字真言：「不求他日好出色，只要到期還本息」，記住呢14個字，Let's GOGOGO！

首先係要採集啲數據，大部份可以係Morningstar個網度搵到，Copy番相應數據就得。其中比較煩嘅係Tangible Asset要係Total Asset滅番啲Goodwill啊Intangible Asset果啲。

Debt to Mature on and before date（左邊尾四）就要摷番財報嘅債項notes計番出尼。隻債2023到期，所以加番總on or before 2023嘅債務，得出1532。

PPE HairCut大概係指「而家賣左啲設備廠房可以賣到咩價錢」，由於呢啲野用途好專，你唔用無咩人會用，一般都要折價先賣到。呢個Case尼講，Proved果度係有油嘅地方，用桶數乘以油價得出尼，所以折價可以少啲我比左70%；，Unproved同其他當無油，比左10%佢；計番比例，PPE haircut係原PPE數嘅65.3%

搵齊數之後（唔知仲有幾多人睇緊呢⋯⋯）首先我地要睇佢還唔還到息，重要嘅測試就係Interest Coverage，即係佢搵嘅錢還到幾多次利息。呢度重點睇兩粒數：5Y Low OCF/Int同5Y Avg OCF/Int。前者係想知佢最差果陣還唔還到，後者係想知佢平均果陣還唔還到，可以睇到兩者都可以還到3次，算係合格。

然後就係估算佢尼緊呢五年搵得夠唔夠錢還本金。個概念大概係假設某個收入收五年，加埋而家手上有嘅Cash，減番到期果陣同之前要還嘅債務，睇下有無錢淨，有就係還到。呢度幾個唔同嘅數係唔同計法嘅OCF 、FCF同EBITDA下還唔還到，但主要都係睇OCF。畢竟還錢用現金，OCF就係佢做野賺番尼嘅現金；EBITDA唔係現金係會計應計數，FCF係減左資本支出嘅現金流，而資本支出係可以控制的，必要時可以減少資本資出尼還錢（但最好FCF結果都係正啦，點知減資本資出會唔會做唔到落去架）。

EBITDA同OCF個數差咁遠，通常係因為公司係會計上做左啲手腳；FCF計都好負，咁要諗佢少左資本支出仲維唔維持到咁多OCF；要進一步鑽研佢做左啲乜。OCF就都還到嘅，但考慮埋FCF個數似乎有少少危。

再睇睇佢再融資能力如何，反正佢搵唔到錢還但借都錢都唔係唔得嘅。比較番佢債項佔廠房設備嘅百份比（Net Debt/PPE）同清算價值（PPRHairCut）估算，佢賣哂啲PPE係可以冚到啲債，咁就有融資能力；Debt issuance Net 5Y rationale係還得嘅錢就借得番出尼，當係佢未來融資能力嘅一個參考咁；右圖講嘅係佢仲有2022年到期1250 Credit Facility未用，但2022年到期嘅野保唔到2023年嘅債，除非可以續，參考下算。

最後就睇佢整體還債能力如何，主要就係要睇佢Debt/OCF個數可唔可以細過債務到期嘅加權平均（呢度就係右下角3.11果個數）。Debt/OCF個單位係年，講緊「現時嘅OCF要幾多年先可以還清啲債」；而債務到期嘅加權平均就係講緊債務平均幾時會到期。如果佢還清個年數係多過到期年數，咁就即係還唔清啦。

點解呢個數咁重要呢？佢明明還到2023（ 即係想買果筆）嘅債，咁其實就還到本買得啦！但係2026嘅持有人都會諗到自己啲債危危乎，就可能會低價沽左啲債出尼，公司就有動機回購番2026嘅債，咁就減少左可用於2023還錢嘅資金。同樣地如果股東知道佢未必還得起啲債，就會賣低個股價，佢想發新股還債都事倍功半。還唔起債會影響佢嘅資本結構，令到你手上嘅債無佢睇落咁安全。

呢個Case入面連最樂觀嘅OCF都無法準時還到錢，咁所以佢靠自己係未必還到本金的，呢個情況就要睇番佢再融資能力如何，如果佢個Credit Faciliy同其他債可以延期同更新咁就唔怕破產，但一日唔賺多啲錢都只係苟延殘喘。

五、結論

如果佢可以控制Capex而又唔減少產生OCF嘅能力，以過去五年最差嘅情況營運都仲可以還到2023條債。萬一再差啲都有相當嘅融資能力可以借到錢番尼還，但如果Credit Facility無得續期就可能會有周轉困難。至於三年內還清啲所有債就應該唔得，引申問題會威脅到2023隻債嘅還本。呢隻債還本付息能力絕對係徘徊係死亡邊緣，雖然照計還清呢條債無問題，仲有14% ask yield，但考慮到手上已有三隻油債，都係再諗諗先。

P.S. 感謝KT巴打循循善誘教導同解答先有呢篇文出到尼！！！