All-In贏左，然後呢？

每個牛巿都會有一群人中意all-in某啲備受觸目嘅公司，慢慢就會有一班未接觸過股票嘅人跟埋一齊all-in，推到個股價有咁高得咁高，直到有一日唔夠新資金加入買方，一路存在嘅賣壓就會顯現，股價就插啊插啊⋯⋯

OK我地今日先唔好講股價插果陣點，想像今日係一個疴煙完股價大升嘅日子，你用一個月嘅糧賺左一個月嘅糧，係一個風和日麗嘅好日子。正當你意氣風發坐係度對住個綠色數字歡呼之際，你突然諗到一連串好剎風景嘅問題：今次賭贏左，然後呢？賣左佢夠用成世？好明顯唔係，咁係咪要再all-in多次搏番倍？但咁搞法係咪真係舖舖贏先？又唔係咁肯定喎，仲要一輸渣都無⋯⋯咁或者分開幾份炒希望有贏有輸overall贏work唔work？喂唔係喎，炒一隻已經要𥄫到實一實，炒幾隻點搞？就算真係得我係咪成世金睛火眼睇住個巿？咁樣計落炒番尼個時薪同番多份工有咩分別？唔係好對路喎⋯⋯仆街啦有無其他方法架？我想退休啊啊啊啊啊！！！！！！！

投資尼serve自己，唔係自己serve個投資

比一大堆搞唔掂嘅問題搞到崩潰左嘅你坐係度冷靜左陣，開始整理番頭先嘅問題：

1. 原來你投資嘅目的係為左「退休」，即係唔洗番工都生活到，做自己真係想做嘅事。咁一係要賺到舊夠洗到死咁大舊嘅錢，又或者係確保每隔一段時間就可以得到一筆收入，又或者搵個人養（？）都得
2. 你並唔係想番多份工，所以舊錢或者持續收入係要儘量少勞動下得到嘅
3. 你唔肯定你嘅投資方法係咪真係包贏，為避免損失，你要搵方法鎖定勝率
4. 但你肯定嘅係錢越多越好，最好可以通過再投資滾大佢，永續雪球

仔細整理之後，你會發現自己需要嘅唔係炒炒賣賣，而係一個可以自行運轉，持續產生現金流以供消費，或者再投資番入系統，產生更多現金流，生生不息嘅「投資引擎」！

唔理你係價值投資要低於估值買入，定係睇圖見升買入都好，都係講緊揀中個股賺錢，思維局限左係單一或者少數投資決定入面。但係正如上面講到，單一投資賺左，然後呢？要將資金盈利滾存，單靠做啱一兩個投資係唔夠。無論係出左糧有新資金還是舊投資贏利，新資金都需要部署，你必須不斷咁做新嘅投資決定，呢啲決定又會塑造你嘅投資組合，影響你未來嘅盈利。你需要建立一套程序同方法去guide住自己未來嘅決定，慢慢將你現時嘅組合型塑成你理想嘅樣子。呢套指導投資決策嘅程序，就係「投資引擎」。

套路唔係個個啱，原則係引路明燈

巴菲特有間保險公司比錢佢投資，有團隊幫佢分析計數；Peter Lynch有十幾條𡃁，仲可以上門同經理傾計； 你同我就只可以自己打本比自己，去到盡都係一條友坐係屋企睇年報摷資料。每個投資者嘅嘅能力、手邊有嘅資源都唔同，散戶想好似巴菲特咁玩既唔可能亦未必適合。不過An expert is once a beginner，新手有新有啱洗嘅系統，大師有大師先做到嘅操作，投資系統無one size fits all嘅套路，但我諗建構系統嘅時候，有啲原則係新手村新手定魔王城魔王都要守嘅。

一、明確組合目標同成員角色

每個資產都有佢嘅特點。有爆發成長嘅潛力但又可能total lost嘅Long option，有好穩陣但係就無乜成長空間嘅債券，有穏定成長但有少少風險嘅REITs同公用股，有承擔風險換取收益嘅Short Option，有對沖風險嘅Credit Default Swap同Futures等等。搞清楚自己買個資產番尼係擔當咩角色，塑造一個咩樣嘅組合，揀番適合公司嘅適合資產。穏定收息就用番REITs同債呢啲穏定收息類資；炒波幅就炒番大波幅嘅Long option同正股；對沖風險就用番CDS、futures。唔好做啲「買港燈債券搏佢成長」，或者係「Short Call騰訊當收息」呢啲九唔搭八嘅事。諗清左個組合需要咩樣子嘅隊員之後，按自己嘅要求去篩選出所需資產，之後先至到平時大家成日吹嘅公司分析。

二、集中定分散要睇能力同資源

集中同分散投資邊個好啲都係千年之爭，我自己睇法係兩者無absolute嘅優勢，一切都係要睇語境。如果世界上得十個投資品，要點先可以賺到最多錢？自然係all-in回報最高果個，但同時一輸就輸哂。如果想安安全全咁賺取平均回報，自然係分開十份，有咩事都係少咁十幾%唔會死，但就會比回報低嘅部份拖低回報。乍看之下係回報同風險之爭，高回報就高風險，低風險就低回報，係女朋友同阿媽跌落水救邊個嘅問題。

其實呢個係偽命題尼，因為你可以分析啲投資品。如果我通過分析進入全知角度，知道哂啲投資品幾時會有幾大損失，咁我咪可以all-in回報減損失最大嘅投資品咪賺最多錢囉，集中投資完勝，分散你老母。

呢個又係尻結論尼，因為你分析得再好，你都係做唔到全知。一日唔係全知，一日都會可能有你唔知嘅因素突然就收你個投資嘅皮。呢啲你預唔到嘅因素係要硬食，而令你食起尼無咁傷嘅方法就只有分散投資，唔好將粒丸擺哂係同一個春袋度，分散投資完勝。

⋯⋯就唔係咁嘅。越係詳盡嘅分析，未知嘅因素就越少，你亦可以揀啲比較能夠承受風浪嘅企業，縱然唔可能完全消除但都可以減低未知嘅傷害。未知嘅傷害越小，你就越能夠集中投資係回報優異嘅少量資產上面，提高回報。

但係分析有幾深入、數據有幾真實詳盡，都係受投資者嘅精力、時間、資源、人脈等因素限制。巴菲特有十幾條𡃁幫佢分析，你得兩隻手；個人投資者要做到佢咁集中投資係少數優質股，賭無事發生嘅成份遠比巴老咁做大。如果你係一個忙住番工嘅人，無咩時間做分析，集中投資更加係搵命搏，因為你根本唔知手上五六間公司係發生緊咩事。換句話說，集中同分散嘅程度，取決於操作者嘅才能同資源，可以做到幾精細嘅分析，去減少幾多未知數。越了解公司，估值運用嘅假設越貼近現實，對可能狀況同後果都更清楚，就越能夠避免損失。

咁但係如果你無乜才能，又無乜時間分析個別公司嘅人，分散投資絕對係你嘅好朋友。好多時候你只要20%時間就可以了解間公司80%，淨番果20%可能需要80%時間先可以挖到出尼；80%嘅認知係有不足，但係都足夠你篩走完全唔掂嘅資產。考慮埋付出嘅時間同精力，將淨番果20%認知缺失帶來嘅風險交比分散投資處理或者係最好嘅選擇，畢竟如果要花80%時間去投資同番多放工無分別。

雖然分散投資理論上回報會較低，但佢所帶來嘅穏定性開拓左提高回報嘅方法----杠桿

三、現金流同債務管理要謹慎

我有次同朋友解釋杠桿債券嘅原理，佢話「即係危險咁買啲安全嘅野」，我覺得佢講得非常之好。雖然杠桿可以放大回報、增加現金流收入，但同時損失都可能會放大，甚至輸凸本金無法翻身。

杠桿的確係有斬倉、現金流錯配、息差倒掛、外滙債務風險等各式各樣虧損嘅風險，但係呢啲都係可以通過組合搭配解決嘅問題。怕價格波動引致斬倉？配債券呢啲價格波動小嘅資產，留夠buffer。外滙風險？用遠期外滙鎖定滙率。加息息差倒掛點算？買浮息債券。驚現金流錯配？買入有現金分派嘅資產同時借入只還息不付本嘅負債。所有呢啲問題都可以通過調整組合成員搭配解決，只要謹慎管理，杠桿係投資者嘅好朋友。

長遠尼講，投資者唔能夠炒炒賣賣過人世，必須要學習運用唔同Asset Class嘅特點建立一個投資系統，按自己嘅能力適度分散，安全情況下用杠桿提高回報，先可以點著自己嘅投資引擎，開展自己嘅滾雪球之旅。