[隨筆] 善用工具、適度借錢

今日忽發奇想，決定每日都出一篇文。

其實我係一個比較淆嘅人，成日都諗會唔會出錯野比人屌、數據唔夠又會怯，結果成日出文都出到一半去左查資料啊、執下啲前文後理通唔通順啊，執下執下心很累，咁啱篇文又真係成pat屎咁，就會成篇刪左佢，唔撚出啦屌！結果就係打下打下，一篇文都無出到。

所以我決定開個新分類：隨筆。諗到咩寫咩，唔正式、無整理，亂糟糟咁呈現我嘅想法同掙扎，希望做多幾次會無咁亂。

---------------------

連登財經台見到啲人又吹TSLA股票升到好似SpaceX咁叫人all in，呢個又話唔好買盈富（真係唔好買），果個又話買金，但好少人可以提出到佢自己嘅論點同數據支持，其實成日睇到都會想寫啲野。點解香港人好似淨係識all in等升放，柒左就正股驚閪？歸根究底，還是教育問題：香港人對於投資嘅認識，應該最主要來自連登財經台同丁蟹。到底咩叫投資、有咩工具、自己其實追求緊咩，我諗大部份人都無諗過。

我諗重點要記住嘅係，股票、債券、期權、期指、樓、生意⋯⋯係理財嘅角度尼講全部都係工具尼，各自有唔同嘅特性。

你想賭TSLA爆升咩？你可以入正股，用千幾蚊鎂去搏可能一兩成升幅；但你識唔識用期權吖？正股升5%，期權可能用十幾蚊鎂金（我又去左查數據，屌）就可以食到同正股一樣嘅盈利，但本金少成百倍；我唔係反對短炒，但係點解唔用合適嘅工具去炒？

你想固定收息嘅，咁你可以買REITs，佢法定要派息出尼；你可以買債券，又係法定要派息比你；但你買左滙豐正股，係就係派足咁多年無少過，但普通股係寫明人地對派息係有決定權，that's how shares work！你買普通股然後屌人唔派息比你，又係一個對工具嘅誤解。

獲利有好多唔同方法同形式，唔同人有唔同嘅需要，關鍵係認清自己嘅目的，了解工具，再落手砌個啱自己嘅portfolio，我強調係portfolio！任何人叫你all in嘅可以唔洗理佢：所有雞蛋放係同一個籃，就算個籃係五角大廈入面，金仔都有可能發癲炸左佢；再穩陣嘅業務都有遇上黑天鵝嘅一日，唯一可以解決問題嘅就係分散投資。分散投資可能令你無法maximize獲利，但都係令你唔會訓醒底褲都無埋嘅唯一方法。

--------------------

另外一點就係，香港人對於借錢係有好多誤解，對借錢嘅態度都係好兩極。我生於窮家庭，老豆爛賭輸左兩層樓，日日就比人教借錢唔好，但風險從來唔係工具度，而係係個人度。

簡單講個例子，大部份人覺得做九成按揭上車唔係啲咩問題，但係孖展買股票係會輸身家跳樓的。屌，其實兩者都係用資產做抵押去借錢，只不過係你抵押果個資產同借貸幅度唔同啫，一切都係體量配合問題：我孖九成係$1.6買壹傳媒自然第二日就輸到凸；但我孖五成買港燈呢？（又去左查數據）港燈15年來最大跌幅只係23%，點跌法都唔會輸凸，孖完利息收入仲有成6～7%。其實只要你識揀啲波幅唔大嘅資產，就住個波幅去做杠桿，好難會破產，仲有正現金流收入；相比之下按九成供樓每個月洗少成萬幾蚊就真係按尻了。