股票as值累資產的思考

八月中建好左債券倉，然後八月尾揀左七八隻債準備一有新資金就繼續買入。咁係再有資金同埋巿況變差之前（變差先有更多平貨掃），債券方面係無咩做嘅。由於我嘅投資理念需要我搵一啲「值得累積嘅資產」，咁所以今日我認真坐低思考點先可以搵到佢地。

所謂嘅「值得累積嘅資產」係指1）可以持續產生現金流，同時2）整體收益持續增長，且3）增速高於通脹（Starman《我對「資產」的定義和投資債券的心態與考慮》）。簡單尼講，就係唔需要理佢，就咁擺係度都可以產生實質收益直到永遠嘅資產。咁由於佢要求嘅時間係「永遠（即係比較耐啦）」，債券、期權、優先股呢啲有到期日或者有贖回嘅工具就唔屬於呢類，而永續債又好似係唔係一般人買到嘅（如果有巴絲知道點買到話我知！）；ETD或者長債其實都可以，不過了解唔深所以都係先搵股票吧。

第一個要素係持續嘅現金流。現金流呢個詞係財報層面同個人投資層面有啲唔同，但簡而言之都係講緊現金嘅變化，個人投資層面上就係盈利以現金嘅方式體現，相對於資本增值嘅一個概念。擁有股票要獲得現金流，就要搵有穏定派息嘅公司。首選自然係REITs呢啲法定要派嘅證券形式，但公用股呢啲穩定獲利穩定派息嘅都會係唔錯嘅選擇。

第二係整體收益持續增長大於通脹。要做到咁，我認為就係要搵啲優秀嘅公司，好到你覺得佢未來五十年可能都仲會繼續存續（實際上可能十年已經好叻，加上你唔會死住架嘛，投資係動態的），而且會一直以高於通脹嘅速度（大約5%吧）增長。呢個時候巴老嘅「護城河」就有用了，護城河好多人講，暫時就唔詳細講了，護城河呢啲我叫佢做qualitative定性因素，定性因素係screener screen唔到嘅野。好彩嘅係呢啲定性因素會有quantitative定量嘅反映，比如係ROE高過12%咁，所以可以set一個五年平均ROE數去screen走絕大部份唔符合定量測試嘅公司，再一個個睇佢有無足夠護城河。

諗到呢度我又有啲困惑了。長建（1038）唔係穏定增長又派息嘅資產咩？但佢ROE同ROIC都唔算高，得8%，當然負債唔高。佢ROE低（一般認為ROE12%以上先叫勁）係因為基建多數係壟斷，因此會有政府利潤管制，唔代素佢唔優質。但係如果我以ROE 12%去screen就好易screen走左長建呢啲優質野，但用8%又會篩淨好多垃圾，都幾煩惱（順帶一提，我除左搵HKEX仲會搵ASX同SGX上巿嘅公司，所以資訊量好大）。