之前我嘗試以簡單語言總結睇財報呢件事，又嘗試左running commentary咁睇一次財報。雖然最後比我刪左，但兩個attempt之中我都不斷撞到一啲唔屬於睇財報但又同投資息息相關嘅問題：
- 我點解會睇呢份財報？
- 我係呢間公司身上搵緊啲咩特質？
- 如果要買咁要點買法？
一切還得從「如何發現目標」講起。
一、發現：先將Unknown Unknowns 變成 Known Unknowns
"Reports that say that something hasn't happened are always interesting to me, because as we know, there are known knowns; there are things we know we know. We also know there are known unknowns; that is to say we know there are some things we do not know. But there are also unknown unknowns—the ones we don't know we don't know. And if one looks throughout the history of our country and other free countries, it is the latter category that tend to be the difficult ones." ----Donald Rumsfeld好多人都知TSLA係一間電池電車公司、TSM係一間技術領先嘅半導體代工公司、Google⋯⋯係Google啦。我地都明白呢啲係行業翹楚，於是自不然會產生想要投資佢地嘅念頭，呢啲我稱之為「known knowns」投資目標：已經有大量證據證明佢係一間好公司，值得投資。可惜嘅係，呢啲投資品通常已經被充份研究，巿場嘅注意力亦都集中係佢地身上，令佢地嘅價格高企，買入回報乏善可陳（或者未如理想啦）。
相反，一啲我地從未聽聞嘅公司（我稱之為「Unknown Unknowns」投資目標）就算幾咁優秀，因為認知唔到，我地自然係唔會亦不能投資，巿場亦都無太多注意力係佢地身上。玩個遊戲：寫一個list出尼，你可以name到幾多間公司？100間？1000間？2018年全球嘅上巿公司總數有43,342間(1)，就算你能夠列到1000間公司出尼，仍然有超過97%**嘅公司逃脫左你嘅認知，更唔好話你錯過左幾多好嘅公司了。世上好嘅公司實在太多太多，點解我地成日會執著係啲吹到上月球嘅泡沫公司，承擔不必要嘅風險，而唔係投資係一樣優質但不為人所注意嘅標的？
好簡單，We simply don't know！
舉例說，如果我唔話你知有間ZBH係全球人工髖膝關節龍頭，你根本連諗到唔會諗到要search呢三個字；無人講，就唔會有人知製造公認最好嘅咖啡機嘅家電公司BRG每年都有絕佳嘅派息；除非你有睇巿場報告，否則你未必知原來AKAM嘅Web Service巿佔同AMZN不相上下。
如果你唔建立一套方法去發掘不為人知嘅97%，你嘅資金只能夠同其他人一齊逼係果3%嘅標的入面，接受高風險低回報嘅投資。所以投資嘅第一步，唔係學睇財報，而係要建立一套「發現目標」嘅方法。下面輕輕帶過一啲都幾popular嘅做法：
- 生活選股法：留意自己日常生活嘅花費比左啲咩公司，比如電費（港燈、中電）、電話費（香港電訊）、生活雜貨（HKTV)，呢個方法好洗好用簡單直接（比番個credit 2800打手攻城先生，廢事比人告啊大佬）
- 睇年報、新聞同產業報告，留意下你睇嘅公司有咩交易對手、顧客同供應商，可以理解成生活選股法嘅公司版。比如睇國泰你會發現有啲公司係租飛機比佢、有金融機構同佢做燃油對沖咁，又拉多兩類公司出尼
- 睇新聞，實會有啲新聞講咩事件令咩產業公司受影響，如此一來你就知多左間公司；至於值唔值得投資就係後話
- 識一班一齊研究投資嘅朋友，或者得閒睇下blog，絕對有驚喜！
方法係死嘅，人係生嘅。我搵到ZBH係因為路過聽到個阿婆話做左手術換關節然後走去search咩關節好（少變態）；搵到BRG係因為我想升級部咖啡機；搵到AKAM係因為連登之前比人DDoS係Cloudflare頂住（AKAM係Cloudflare對手）等等；視乎圈子同方法唔同，每個人可以得出唔同嘅結果，但核心離不開「追本溯源的好奇心」。我地必須要認知到全球化資本主義之下，每個個體用嘅每一樣野都由另一個個體提供，而提供者好可能就係一間品質優良嘅好公司，你只需要問「XX係邊個做架？」就可以搵到。資訊空前流通，食住呢個時代紅利，跟隨好奇心search一下，你會係果97%嘅uncharted territory搵到自己一片藍海。
成功得到個公司名，將Unknown Unknowns 變成 Known Unknowns之後，就進入下一個階段。
將Known Unknowns變成Known Knowns。
（下回待續）
------------------------------------
**97%自然係吹大左啦，畢竟全球股巿唔係完全流通，仲有語言同外滙問題要搞；但單單係香港買到而係English Speaking嘅穏定經濟體巿場（UK、US、SG、AU、HK、IND等）都已經有14000間。如果conquer到上述問題，其實世界好濶架
後話：話咁快又十月中，距離上一篇投資文章已經成個月。呢個月係就係有少少忙，但歸根究底還是我有點兒不自量力，想寫一篇文總結下睇年報嘅要領，結果處處碰壁，發現自己有好多位根本未掌握通透；想援引例子，卻發現自己其實睇得根本未夠多，苦苦思索都up唔到個公司名出尼。加上最近睇多左其他人寫嘅blog、同多左人討論，發現自己只係井底之蛙大把野唔識，信心大受打擊之下，篇文一拖再拖、刪完又刪，遲遲未能完稿。
幸運嘅係有幾位入門嘅朋友睇完幾篇文，話我知對佢地尼講嘅資訊都好有用。我先醒起從建blog之際就講到明呢個係撞板日記，中醫出身嘅我自然唔係有個好嘅起點，但其他專業嘅人何嘗唔係好似我咁係投資路上跌跌撞撞？既然係咁，姑且頭盔戴足頂硬上吧！
Richard Feynman （好似）話過，如果你唔可以向一個小學生講解清楚你要表達嘅野，你可能根本唔明白呢樣野。呢個時候你要番去revise你嘅知識，填番啲窿窿，追求一個直白通順嘅表述，直到你可以令人明白你要表達嘅野。一個專業作家只可以呈現最後通順嘅面向比讀者睇，但既然係我呢個blog，姑且容我帶住大家見證，一個笨拙嘅思想反覆打磨成為洞見嘅過程！
沒有留言:
發佈留言