What is ETD：估你唔到咁高息

如果大家仲記得我揀公司債果篇文，大家應該知道6%YTM（Yield to Maturity）係我嘅回報底線，五年期係我承受不確定性嘅上限。但其實除非係特別穏陣、用尼宅住個倉底嘅債券，否則我都prefer啲回報坐7%望8%、五年內吊得住命嘅公司就算，反正五年後破產關我屁事。

但係我個criteria出尼得170隻債左右，篩走左啲低LTV、要200K入場嘅債之後淨番嘅已經唔多。加上我堅持每個行業唔持有多過三隻債（單行業唔佔債券組合15%以上），仲要符合財務測試，淨番嘅係咁：

其中 Iron/Steel、Oil/Oil Service同Finance都已經爆左額（性價比亦唔值得我換碼），淨番嘅一係YTM低到性冷感，一係就令人有啲擔心捱唔捱得過。

港REITs收益率都好高，但係始終係equity，本金無保障，價格隨心飛，代替唔到債券嘅防守性（而且我已經儲埋好多REITs了）。不過我又唔係好多資金急住搵出口，姑且慢慢摷，先睇下之前未得閒理嘅ETD Exchange Traded Debt先：

附上查閱ETD用嘅網站

仆你個街，唔望尤自可，一望成版都係8%大水喉尼，原來要搵啱地方要窮係咁撚難。不過天底下無免費嘅午餐，高收益一定有啲野，拎隻UZC（唔洗望上面無）出尼檢查下身體先：

附上查閱ETD屬性嘅網站

ETD話明係Debt，自然同直債一樣有啲基本屬性要留意下。暫時就咁睇評級都有Ba1，比起我平時買果啲7%高好多！再快手上Morningstar望望啲數：

我屈指一算，三年平均OCF係0.63B，最新Debt係2.62B，大約四年多啲就可以還清啲債。考慮埋佢係美國3台咁嘅存在，償債力應該好強，咁ETD係咪有咩潛在問題先會去到7%咁高利率？

「存續期」長變數多

眼利嘅巴絲打應該已經見到UZC嘅到期日係2064年，一個唔知仲有無美國、可能已經唔係用緊LTE同4G嘅遙遠未來。時間越長，曝露到嘅變數同不確定性越多，等於出得多街自然易啲撞車，咁風險溢價（承擔風險嘅報酬）自然比較高。

有一個幾有趣嘅方法去量度年期帶來嘅風險，就係「存續期Duration」：將債券帶來嘅所有現金流折現，計下每一份現金流佔現值嘅比重，乘番得到對應現金流所需時間，加總出一個加權平均時間，計起尼係好似咁：

更深入可以睇呢度

呢個時間係指你持有到得到相等於現值嘅價值所需嘅時間；時間越短，自然出事嘅機會越少，姐係風險都細啲。咁UZC Duration係幾長呢？差唔多14年，快嘅話都兩次金融危機架啦。

贖回細節大不同

所謂贖回可以理解成公司提早找數，連本帶利還番舊錢比你。喂咁如果佢無啦啦就突然話啲錢我唔要啦你同我拎番走咁我咪好頭痕？唔會咁on9嘅，因為直債同ETD都會訂明一個贖回日，但兩者個time window有好大分別；直債個window係一個exact日子，公司只可以係當日提早贖回；而ETD就係當日起任何時後都可以隨時贖回（當然會提早通知嘅）。

再投資風險

直債過左贖回日都無贖回嘅話，除非破產否則都係揸到尾，成件事係好predictable嘅。而ETD隨時都可能被贖回嘅特性可能會surprise左投資者，短時間內未必搵到回報滿意嘅資產停泊資金，承擔較重嘅再投資風險。加上往往係低利率環境下，公司先會有動機低息借貸贖回高息債務，令投資者更難搵到滿意回報。

買入贖回差價虧損

隨時贖回嘅特性亦都令高於票面買入嘅投資者有虧損嘅危險。以UZC為例，如果你27蚊買左，聽日就要召回，咁就即刻硬食2蚊虧損；如果只係25.5買入，你都要搏佢呢一季唔會贖回先得。買家必需要非常注意買入價格同票面價值嘅差距以免虧損。當然掉番轉尼講，如果你20買入但聽日贖回，咁就賺左25%了。

然而正正係上述兩點，ETD先至咁好賺。存續期長以及再投資帶來嘅風險反映左係高票息率上。有趣嘅係潛在贖回損失令大部份ETD價格唔會高於票面價值，即使係低息環境資金流入高息資產嘅情況下，過左贖回日嘅ETD仍然唔能夠搶太高價（當然換句話說無得升值啦），歡迎大家隨時入巿咁；若果真係贖回左，你隻債就即刻變左短債但收就收長息，諗起都爽。

清償順位

ETD 雖然係Debt，索償權優先於普通股同優先股，但係Debt入面都有唔同嘅索償順序，大約係咁：

1. 第一留置權 First Lien Bond / 優先擔保債券 Senior Secured Bond
2. 優先無擔保 Senior Unsecured Bond
3. Senior Subordinated Bonds / Unsecured Bonds / Senior Notes
4. Subordinated Bonds / Notes
5. Junior Subordinated Bonds / Subordinated Notes

直債一般多為1或者2，而ETD一般都會係Notes，即係排係呢個表嘅第3打後。即係話破產清算嘅時候，直債in general會比ETD更大機會拎番啲錢，所以ETD嘅風險會比直債高。不過呢個係In general啫，實情都係要睇番條債有咩條款，比如UZC呢度咁寫：

姐係話UZC呢債ETD係排2級，索償權上唔會比直債更危險。不過其他就要小心啲啦，比如MDLQ呢隻就係排第三嘅例子：

流動性風險

ETD係交易所買賣，比起OTC交易嘅直債流動性高、價差窄，少啲出現壓價都無人買嘅情況，容易套現。但亦由於佢係交易所方買賣，價格更易受大眾情緒影響，三月果陣UZC（留意番佢係電訊商尼，本質上係穏定）個ETD價跌破左15USD：

同期直債都有大跌，但幅度generally無咁大。就算ETD係一隻債，就算公司業務穏定、償債力雄厚唔會破產，低評級債券係巿況波動嘅時候仍然會係第一批被拋售嘅資產。如此大幅嘅價格波動都足夠斬你倉，破你產，是為「流動性風險」。大家可以見到前後嘅時期價格其實都相對穏定，但損失嘅風險未必係隻債度，可以係你個倉同操作度；好似我成日講嘅，有LTV唔代表你可以杠桿唔留buffer，杠桿前先諗風險！ 

除息注意

直債trade個價係本金部份嘅價，應計利息會另外計：票面1000嘅債賣950，而隻債累積左10利息，咁你就會比950＋10，但你買果陣個睇個價係950 only。ETD就無應計利息，25就25、24就24，投資者要自己計番應計利息係幾多；宣布派息之後會係除息日從價格減走分派嘅利息，同股票一樣。

再以UZC為例，今日係5 Nov，上次派息係1 Sep，已經過左30＋31＋5＝66日，咁我地只要將利息$1.81*66/365=$0.327，加番Par $25，$25.327就係隻債嘅本金加應該利息價值，而家賣緊25.64，即係有1.23%溢價。

ETD嘅其他特點

其他特點無咁有趣，但對砌組合好有用，就隨便係度表列講下：

1. LTV高（Maintanance Margin低）：如果將等額嘅直債換成ETD，維持保證金要求會下降，個倉更加襟跌；不過千祈唔好因為多左Liquidity就加滿個倉，點都要留夠buffer！
2. 門檻極低：ETD 25鎂起跳，即使係低淨值嘅都可以靈活運用，甚至可以全部ETD都買一隻整個ETD基金分散投資。
3. 季度派息：息魔一族最少買三隻就可以做到月月有息收，有助強化組合現金流
4. 不扣股息稅：因為佢係債尼

介紹就介紹完啦，實際上可以點fit落個組合呢？等等我過幾日再寫個case出尼吧～