[投資初哥的自我修養]：希慎慘案血的教訓

2020年7月13日，巿場仍然一片頽垣敗瓦，係一片恐慌之中，我以每股$22.55嘅價錢買入希慎興業（14），當時股息率係6.4%。買入原因好簡單：希慎=軒尼詩道以南大半個銅鑼灣。

買完梗係去巡舖啦（其實係路過），果陣啲人（包括我）都仲係好驚武肺，結果我行到銅鑼灣係咁（示意圖咋唔係真係咁的）：

喂屌你⋯⋯無人嘅？條街無人行，商場無人行，啲舖直頭唔撚開，再咁落去啲舖執尻哂咪聽收皮？仲有果啲利園幾期幾期，其實平時都無咩人行過去架喎，自由行又唔落尼買包包⋯⋯

總之我果下好驚啦，擺左幾日上上落落，去到24.5就走左嚕。

時間Fast Forward到今日，武肺just a flu，個撚個中左都無病癥，銅鑼灣變成咁（示意圖again）：

而希慎興業變成咁：

我變成咁：

比一分鐘大家恥笑下我：

今日我講出尼比一班一齊學習股票嘅朋友恥笑完之後，有個智者語重深長咁話：「講真，事後孔明冇用，最緊要你回想返你當時decision making，邊part錯左」。無錯啦，學費交左，咁有無學到野先？我馬上陷入沉思⋯⋯

七月係咩時期呢？我下定決心由支牛轉IB，趁巿況咁嘅樣大執倉位買番啲好野；於是我先清哂支牛個倉套現，再掟去IB買新貨。IB開倉係成手都係Cash，驚住個巿突然爆升就心急想要快啲部署好，同時自己考緊牌又處理緊一堆大鑊野。成個七月整個人處於心急緊張嘅狀態，做嘅決定亦都非常倉促，無做夠（甚至無做）調查同估值，自然對自己嘅決定信心不足；加上果陣倉細，一手希慎已經10%倉，10分淆底，又無market insight 覺得6.4%好少。信心不敵恐慌，八月震兩野就嘔番哂啲貨出尼。

十月嘅我搞掂哂堆大鑊野，整理好個投資策略，成個人定番之後諗番真係慚愧。正如我係SPG文末提到，租金明明係商戶最高優先度嘅支出之一，交唔起租錢仲有商戶嘅盈利同流動性做buffer，唔係咁易傷到業主；加上人係會適應，唔會真係永遠唔行商場（屌你打仗都係咁做生意啦，Paradigm唔係話shift就shift ）。Exposure唔夠令見識淺薄、壓力令決定倉促、缺乏認識令信心不足，導致希慎呢個柒Deal永不磨滅。

不過係咁架啦，做新手睇完一大堆書，口upup咩堅守估值有紀律交易唔好受感情影響，買果陣信誓旦旦話會strong hold，屌你人邊撚度靠得住架？美國一日死成萬個人果陣咪又係嚇到瀨屎走都走唔切！你估你係巴菲特咩，心理質素喎，你散戶乍柒頭皮！

（好大部份係恥笑緊自己，因為真係抵屌）

係幾好笑嘅，口口聲聲話要打救散戶點知自己係最散戶果個⋯⋯不過唔緊要，我就係要證明我得你地都得，今日同大家分享我自己點去排解呢啲散戶嘅困擾！

「迷你倉」減低犯錯成本 去去壓力走！

話說初頭玩債果陣仲未係好掌握到要睇啲咩野，膽粗粗入左啲67蚊嘅電廠債；後尾搵極都搵唔到間公司嘅財報，即刻淆底賣左，蝕左成10%有多（後尾隻債上番Par，其實柒事都真係幾多下）。咁但係由於呢個deal只係佔我倉3%多少少，個虧損只係全倉嘅0.3%；所以今次我好冷靜，可以諗清楚自己錯咩：太受價格（姐係巿場嘅意見）影響，其實人地破產價賣比你都未必真係破產架啫！好多破產價嘅債券經過分析發現其實根本無事，不如就勇敢少少揸實啲啦！結果好幾隻都上番哂Par，起碼無進一步跌先。

通過分散投資、限制投資額，你做錯一個決定嘅成本會變到好細，情緒波幅亦會相應變細，你嘅理性就有空間學習點去處理情緒。

更進一步，因為你倉位細，你就可以勇敢啲試新野，測試唔同工具、策略同思路。比如我有個朋友係玩技術分析，佢睇完我啲文對價投有啲興趣，於是佢打算比20%資金做價投試下水溫；我未玩過option，所以我細細地試下Short個靚Put；我對自己嘅分析未夠信心，所以SPG都只係揸左5%倉位就算；甚至你好想炒股嘅，咪攞5%尼炒下過下癮，其他坐定囉。

學野少不免要在犯錯中成長；通過分散投資、限制投資額，你創造左個容錯率高嘅環境，確保自己做錯嘅野doesn't kill you，先至可以be stronger。

持有收息資產 回報唔洗睇巿場面色

七月前我主要係跟某成嘅「先增值後現金流」策略去投資，後尾我發現呢個方法唔係咁啱我（唔啱我乍唔係話佢唔好）。即使我做足分析同估值，確認有足夠嘅安全邊際，我仍然要等巿場發現個資產嘅價值，甚至要先經歷幾年嘅持續低估，回報完全at the mercy of market。搞唔掂，個回報太唔certain，而uncertainty is risk，我超緊張完全坐唔住個倉。

後來有幸拜讀Starman嘅《現金流為王》，佢好value「有數得計嘅投資」，於是我就開始接觸債券：只要佢唔破產，你買入果下回報已經注定，巿場價格波動大可不理（唔爆倉就得啦）。再進一步思考，即使6823呢啲係咁陰跌嘅野，只要佢維持到派息，我嘅回報都係計到數，完全唔洗理巿場發唔發現到佢嘅價值。就好似請左個人番尼幫我打工咁，只要佢繼續deliver到，巿價波動大可不予理會。

抱住呢個思維，確保手上嘅資產既無重大破產風險，公司無重大本質變化，即使十月曾經有（算係）大幅嘅回調，我都係十二點就訓，訓得仲好冧添！

深入調查仔細估值 管理期望

又番番去希慎慘案：如果我買果下知道佢值$30，我仲會唔會賣？答案梗係唔會，好明顯我果下根本無諗到佢值幾多呢個問題。好多人就好似我果陣咁，買果陣根本無思考自己買左啲咩、價值幾何，咁就好易比啲師奶消息同新聞話香港變香港巿果啲動搖到，因為根本對間公司無認識。

到我睇SPG果陣，我就有認真了解佢到底係做啲乜、面對咩困境，再依照呢啲因素去估值，得出佢價值幾何，對佢嘅風險亦都有所認識，acknowledge左佢的確有些少投機成份，咁佢嘅上上落落就係expected嘅事，配埋上面兩點，損失唔重，收住息等，自然就悠然自得咁得正正係度。

Keep住搵到好西 唔洗FOMO高追

我發現好多時自己想高追都源於一個心理：蘇舟過後無艇搭（FOMO Fear of missing out)！今次唔上車等幾時？於是個人就急，急就疏忽、急就說服自己無事、急就奶野，所以我自己好著重持續發現好西嘅方法。唯有相信自己下個可以更好，我地先至唔會心急追入「好」野，可以仔細思考分析。

實際上世界股巿真係太撚大，好多好野大家係聞所未聞。除左連登連載緊果篇野所講嘅Keyword大法，美股好興有啲人寫文介紹股票。你固然可以當佢係金融經紀sale野咁一笑置之，但人地嘅意見不失為一個好嘅起點比你去發掘；而且孰優孰劣，我地點都要自己分析一下嘅，當練習又好確認又好，總有益處。

Contain the fear, strive for better

總結成篇講左啲咩

1. 分散投資減低犯錯代價，令自己無咁大壓力
2. 仔細調查搞清自己買緊乜、做足估值理清潛在回報，定定心唔洗比雜訊干擾
3. 以收息資產增加回報確定性，唔洗下下睇巿場面色做人
4. 令自己搵到多啲好野，Miss Out無有怕

投資者係脆弱的人類，好易會受唔同因素影響大決策質量。作為過來人，我無依賴自己不可靠嘅心志去克服呢啲影響（因為我知自己唔得），反而嘗試左用一啲組合部署同埋投資方法去mitigate呢啲影響，效果都幾好；唔知巴絲打們又有無啲咩特別方法去克服人性的弱點？