之前係all-in篇文提過，投資要建立一個組合，而建立一個組合要先搞清楚自己想塑造一個咩樣嘅組合，買個資產番尼係擔當咩角色，再揀番適合公司嘅適合資產。齋講係好簡單，但點樣叫一個連有乜可以揀都唔知嘅新手去想像自己要砌啲咩組合？點為之一間好公司、唔同公司有咩特質、投資者可以揀咩類型嘅回報⋯⋯通通唔知就建議大家諗自己想要咩組合，就好似叫個一歲BB諗清楚大學讀咩科咁，根本唔make sense。而如果唔諗清楚自己想要咩組合，搵公司果陣會好迷茫，睇哂成份財報都只係會得出「啊呢間唔錯」嘅判斷，至於入幾多、擔當咩角色，完全唔知。如果你建立左一套搵股系統，大量嘅ticker絕對會淹沒你嘅腦袋，足以令你大腦閉塞，停止運作。
我地需要一套框架同座標安放多如繁星嘅公司。
企業生命周期
企業嘅一生分為四個階段：初創期、成長期、成熟期以及衰落期，各自有唔同嘅財務特徵以及回報確定性，回饋投資者嘅方式亦有所不同。以企業生命周期作分類公司嘅第一個框架，投資者就可以大約掌握公司提供嘅潛在回報、回報形式同埋風險。
初創期：高風險、高回報？
話明係初創期，公司一定係無乜往績紀錄可以參考；間公司可能仲未發展出成熟嘅商業模式，成本控制得未係好好，因此尚未盈利，甚至未有營收，更唔好話有正嘅營業現金流。因此初創公司負擔唔起債務融資（因為無收入來源比利息），公司嘅資本架構一般會以股權為主。而為左避免因籌集資金發行股份稀䆁股權令創辦人失去話事權，初創公司可能會積極採用普通股以外嘅融資方法，例如同股不同權、只有股息索取權嘅證券（例如優先股）等方法去融資。呢啲公司最主要嘅concern，就係可唔可以生存到開始盈利果一刻；畢竟唔盈利遲早就係破產清算，白忙一場。
而對投資人尼講，呢啲初創企業嘅股票流通量好低，買賣盤都比較少，相對大股流動性較低，可能要大幅調高調低價位先可以做到買賣。而因為佢地根本唔盈利，投資人獲得回報嘅形式就只可能係巿場看好帶來嘅資本增值；咁投資人嘅盈利就要求間公司未來能夠摸索到生存盈利之道，或者財報能夠吸引到更多資金，當中巿場情緒佔比相對較重，自然就比較volatile and uncertain。
近年符合初創企業財務特徵嘅例子，我諗莫過於2012～2016年左右嘅TSLA啦。果段時間嘅佢長期虧損，負債率低，近年先慢慢開始盈利，投資人賺錢嘅方式都係巿場睇好佢未來帶來嘅資本增值。初創企業投資潛在回報應該係所有階段入面最高，但uncertainty亦都係最大。咩意思呢？看圖說故事：
所以要以有限嘅資金扑中一隻tesla到底有幾難？簡單計計expected return，用100蚊投資100間新創企業，十年後有77蚊無左，淨番果啲要有303%回報先打和；雖然扑中一隻TSLA坐到而家大約賺到380蚊，但係咁多年都無盈利，中間仲供過咁多次股，係咪個個都坐得住呢？不過重點係明白初創型企業嘅財務特徵為何，以及其大幅度但極不確定性嘅資本增值回報形式。
成長期：最迷人的憧憬
初創期企業如果捱得住，應該就可以發展為成長期公司了。同初創公司一樣，佢地仍然年輕，未有太多歷史數據係度。同初創公司唔同嘅係，成長期公司營收開始高速膨脹，同時成本開始under control，盈利模式慢慢開始穩定，雖然盈虧狀況反覆，但整體走向盈利，開始有能力借債融資（但都未係好多）。
出於營收同與盈利快速增長嘅憧憬，即使淨利同營收唔高，呢類公司嘅巿值往往大幅高於其帳面價值，而且會因為盈喜盈警大幅波動（Beta大）。亦因為咁，佢地嘅股票會比初創企業流通量高。處於呢個階段嘅公司往往會保留盈餘作再投資，繼續擴充營收同控制成本，因此唔傾向派息或者回購，甚至會要求供股。但係今次除左巿場睇好佢之外，踏實嘅業務增長都為佢增加左價值，投資人嘅回報就反映係相應嘅資本增值上，而且情緒佔比會少過初創期公司好多。
缺乏例子嘅我又只能舉出近年嘅TSLA鳥：營收自2016年起狂升，盈利缺口慢慢收窄，可以預期隨住規模效應同自動化生產推行，成本會繼續下降。隨之而來嘅係巿場對佢（定Elon Musk）未來嘅憧憬，令佢股價突破再突破（但仍然無盈利）。投資者雖然獲利，但唔係來自企業成功運行的回饋，而係內在價值同巿場樂觀情緒嘅嘅增長帶來嘅資本增值。
成熟期：平淡是福
隨住企業體量增加，要維持20%以上嘅增長幾近不可能，成長期唔會永遠持續，增長率會慢慢減退，最終會趨向國家經濟嘅增長率（GDP成長率）。係呢段時間，企業會發展出穩定嘅盈利模式，令佢嘅淨利率及現金流趨向穏定。由於現金流充足而穩定，企業會傾向使用較股權低成本嘅債務融資來提高價值。
前期投資開始收成，同時再投資需求下降，加上債務工具越尼越viable，企業面臨大量多餘現金（或信用）累積，就可能會選揀進行併購以求追一步成長和取得其他經營優勢，或是派發股息和回購以回饋股東。於是投資者便可以從企業分派中得到實實在在的現金流回報，亦可享受回購帶來的股東價值增值，間接帶動資本增值。當然啦，成熟同時意味住無乜突破，呢啲公司唔太可能有一年增加20幾%營收呢啲事情發生，自然唔太可能有啲咩股價大升大跌（Beta細），係好事同時係壞事吧（我中意喎）。
領展（823）應該都可以算係成熟期嘅表表者了。過去十幾年靠住升級屋邨商場獲得大幅增長嘅模式，到今日已經開始面臨瓶頸。財報上可以見到佢嘅收益成長的確開始放緩，邊際現金流已經非常穏定（當然部份係由於房地產業嘅特性啦，但的確有房託係無乜現金流架，例如大麻房託IIPR）；近日亦見到佢趁低利率發左新債，而筆錢無論係攞尼投資新房產定回購，對股東都好有利。成熟企業嘅特點就係財務上穏定，而且能夠實實在在咁回饋股東。
衰落期：事情會變好嗎？
如果企業滿足於成熟期嘅成功，不思進取，好快佢就會比瞬息萬變嘅時代拋棄；即使企業創新依舊，組織規模龐大亦會令佢無法作出重大轉向，只能眼白白睇住自己衰落。隨住各種破壞性創新不斷顛覆各行各業，衰落企業會發現自己營收停滯甚至開始衰退，毛利、盈利邊際縮減，投入資金回報小於資金成本。由於再投資回報少甚至會虧損，企業嘅資本支出會縮減，甚至會選擇出售資產套取現金；加上成熟（但慢慢過時）嘅營運模式，剛開始衰落嘅企業仲會有相當唔錯嘅現金流。
呢筆現金流可以用作分派、回購及贖回債項，慢慢縮表清算自己，但由於營收慢慢收縮、權益因為虧損而減少，公司嘅債務負擔可能會日漸沉重，有破產嘅危險。股東雖然可以得到實實在在嘅分派回報，但呢筆錢派完都唔知搵唔搵得番，所以衰落企業股價都會傾向下沉。如果公司唔想死，其呢筆現金流亦可以支持公司大刀濶斧改變經營方針，投資新項目重頭尼過。如果呢間公司真係可以捲土重來，投資者的確有機會財息兼收！
曾經稱霸㩒制手機嘅Nokia就係衰落期公司嘅表表者。2007年起營收加速下滑，到2011年開始轉盈為虧；廠房設備資產不斷減少、資本支出縮減、權益下跌、派息開始斷斷續續⋯⋯而佢嘅股價係反覆往下：
不過Nokia近年轉營定位成5G網絡建設者，近年收益開始有啲起色：
到底NOKIA會係財息兼收嘅復活企業，還是迴光反照嘅衰落企業呢？留番比有研究嘅巴絲答啦。
掌握左四期特點，然後呢？
初步介紹左四期公司各自嘅財務特徵同回報形式，我諗大家開始可以identify到自己腦入面唔同公司大約屬於咩階段，從而大約估計到公司帶來回報嘅形式同確定性。於是大家可以畫個咁嘅圖去擺你啲標的，或者檢視組合確定性同回報偏重：
（字醜又唔識用電腦畫唔好片）咁樣visualize左之後，你就可以睇下自己滿唔滿意呢個分布，然後對比番你shopping cart嘅候選人作調整（利申上面呢個唔係我嘅組合尼架）；而通過唔同方法收集番尼嘅ticker都唔會再亂糟糟，可以用個表擺好佢地。
不過呢個都只係一個初步嘅方法，到大家經驗更多嘅時候，或者會有更為系統嘅方法去處理收集番尼嘅ticker，到時大家一定要上尼同我分享！
成本決定回報
呢度個「潛在回報」係以公司發展潛力為準，而唔係投資者回報。投資者回報永遠由買入價決定：潛在回報再高嘅成長期公司，如果大幅高於價值買入，仍然可以無利可圖；大幅低於價值買入衰落公司，反而可以有利可圖！有關價格、價值同學全邊際嘅概念，可以睇下
呢篇文。
（後記：拖左好耐結果都係出篇詞不達意嘅爛文，睇尼我距離投資大師仲有好大段距離，都係收收皮先）
沒有留言:
發佈留言